Health education program for Alexandria main university hospital patients

اول مرتب ^_^

اول مرتب ^_^

يا هلا .... طبعا كل الناس الطبيعين بيقبضوا مرتباتهم فى اخر كل شهر
احنا بقى متمييزين فقبضنا فى نص الشهر اللى بعده
" رضى "
المهم طلعت اقبض زى باقى زمايلى , فسالنى الصراف " سكن و لا من غير " فقلت له اه سكن

"  سكن اطباء الامتياز يعنى "

و كان لسه هيعد الفلوس قدامى قلت له هتعمل ايه خليهم ببركتهم و خدت الفلوس زى ما هى على جيبى ....
" للعلم الفرق بين مرتب المشتركين فى السكن و الغير مشتركين انهم بيلغوا نسبة الارباح اللى على مرتب طبيب الامتياز و دى طبعا مبلغ كبير جدا كنت ممكن ادفع قسط العربية منه الا و هو 60 جنيه "

و خدت الفلوس و اتحركت و قبل ما انزل على السلالم خطرت ببالى فكرة , " ده اول مرتب اقبضه من الحكومة لازم اتصل بآلاء و آية و افسحهم النهاردة " و لسه هتصل بيهم ... لقيت نفسى بفكر فى اللى انا فكرت فيه تانى " انا هتصل بآلاء و آية و اقولهم يجهزوا علشان هنتفسح بجزء من المرتب بتاعى و هاخد تاكسى لحد عندهم و اروح بيهم الملاهى و نشترى لعب و ايس كريم و نتغدى بره و نروح جنينة الحيوانات و نجيب سودانى للنسناس بعشرة جنيه و سندوتشات جبنة لسيد قشطة بعشرة جنيه كمان و نزور المتاحف و نشترى بلالين و نتغدى ففى ماكدونالز و نتعشى عند حسنى و نتمشى على البحر و نشترى ذرة و فيشار و اشترى فستان لآية و فستان آلاء و ارنوب لآلاء و دبدوب لآية و احنا طالعين من المحل يشوفوا باربى فيقولوا عاوزين باربى فاجيب اتنين لهم كمان و طبعا قبل ما نروح البيت لازم اروح البنك علشان اشيل بقيت المرتب هناك فيقابلنى موظف الامن و يسالنى تحت الخمسين الف و لا فوق الخمسين الف

" سؤال بيستفزنى جدا الصراحة :\"
فترد آلاء و تقوله فوق الخمسين طبعا ده خالو
فيبص الامن لى و اقوله ايوة زى ما قالت بالظبط
و اول ما اوصل للشباك اطلع كل الفلوس اللى فى جيبى و اللى هى بقية المرتب و احطها فى البنك و اسال موظف البنك " انا لو عاوز اشترى مروحة بالفلوس اللى فى حسابى محتاج وقت اد ايه على ما احوش تمنها ؟....فيرد عليا و يقولى " لا انت ممكن تبقى تخلى اى حد من احفاد آية يجى يستلمها "....آآآآآآآآآآآآآآآآآآآآآآآآه
و هنا افوق من التفكير و اشيل الموبيل فى جيبى و اتراجع عن الفكرة كلها و اساسا الاء و آية فى السعودية هروح لهم بتاكسى ازاى ؟؟؟؟؟
" معلش بقى فرحة المرتب :\"

الرشــ م ح م د يدى

طبيب مسلم

21\4\2012